جوزي بعتلي ٢ – منى السيد
الظابط وقف قدامي دقيقة قبل ما يمشي، قالي: “أنتي يا منار هتيجي بكرة الصبح سرايا النيابة تدلي بأقوالك كشاهدة إثبات في القضية، وتقدري تجيبي معاكي محامي من طرف أهلك عشان الإجراءات، متقلقيش، حقك وسمعتك برة اللعبة دي تماماً والتسجيلات كلها في صالحك.”
قلتله بصوت مهدود: “شكراً يا فندم… ربنا يظهر الحق.”
خرجوا كلهم، والباب اتسد وراهم، وفضل حس السارينات يبعد شوية بشوية من الشارع لحد ما ساد الهدوء التام في البيت، ورجع النور ييجي فجأة، لينور الصالة الفاضية المكركبة.
قعدت على الأرض في نفس المكان اللي كانت مرمية فيه الكرتونة. بصيت حواليا على الشقة اللي ياما حلمت إني أفرشها وأعيش فيها مستورة ومبسوطة مع الراجل اللي اختاره قلبي. بصيت على بقايا سبحة مقطوعة خرزها مفرط في الأرض، وعلى إزازة مية زمزم صغيرة كانت مرمية جنب الحيطة. مديت إيدي ومسكت إزازة المية، فتحتها وشربت منها بوق، وحسيت بميتها بتنزل تبل ريقي الناشف وتطفي النار اللي في صدري.
رفعت عيني للسقف ودعيت ربنا من كل قلبي: “الحمد لله يا رب… الحمد لله إنك كشفتهم قبل ما أوزع البلاوي دي بإيدي وألبس مصيبتهم… الحمد لله إنك نجيتني من مكرهم.”
قومت من مكاني، دخلت أوضتي، طلعت شنطة هدومي الكبيرة اللي كنت لسه جاية بيها من السفر، ومفتحتهاش، حطيت فيها كل حاجة تخصني من دهب وأوراق وشهادات وهدوم. مسبتش فتلة واحدة في البيت ده تفكرني بيهم.
مسكت تليفوني، واتصلت بأخويا الكبير. أول ما سمع صوته قولتله: “تعالالي يا أحمد دلوقتي حالا بعربيتك عند بيت عمران… متسألش عن حاجة غير لما تيجي، عشان تاخدني ومش راجعة البيت ده تاني أبداً.”
تاني يوم الصبح، كانت الشمس طالعة صافية، وكنت واقفة قدام مبنى النيابة وبابا وأخويا واقفين في ضهري زي الجبل. دخلت قدام وكيل النيابة، وقولت كل اللي حصل بمنتهى الأمانة والوضوح، وأثبتوا رسمي في المحضر إني ضحية استغلال ومكنش ليا أي علم بشيء، وخرجت من باب النيابة وأنا رافعة راسي، حرة ونضيفة زي ما دخلت حياتهم بالظبط.
عمران وحماتي وشبكة التهريب كلها اتحالوا لمحاكمة عاجلة، والقضايا كانت تقيلة ومفيهاش فكاك. أما أنا، فرفعت قضية طلاق للضرر، وخدت كل حقوقي القانونية، وسبت ورايا صفحة سودة كنت فاكراها حياة، وعرفت إن ستر ربنا عليا في كرتونة التمر دي كان أعظم هدية رجعت بيها من عند بيت ربنا… ستر نجاني من قاع مظلم كان هيدفن شبابي للأبد. النهاية