البروتوكول الفوري – محمد نور
— وعشان كده وشها بقى بالمنظر ده؟
شريف قرب مني خطوة.
— اتكعبلت ووقعت.
“نور” طلعت ضحكة مكسورة وهي نايمة على الترامبولين.
— كداب..
شريف جز على سنانه.
وفريدة كملت ولا كأنها سمعت حاجة.
— الليلة دي بالذات هتتنقل مستشفى “دار الشفا” في طريق إسكندرية الصحراوي.
أنا عارفة المكان ده كويس.
مستشفى نفسية خاص ومقفول.
وعيلة “الألفي” من أكبر المتبرعين والداعمين للمكان ده.
— مش هتتحرك من هنا.
فريدة ابتسمت ببرود.
— جوزها مضى على إقرار النقل.
— بنتي واعية ومدركة.
— ابني معاه توكيل طبي رسمي هي ماضية عليه بنفسها.
“نور” حاولت تقوم وتتسند.
— أنا عمر المايين ما مضيت على القرف ده!
فريدة قفلت الملف بقوة.
— سيادة اللواء، انتي بتتدخلي في حاجات أكبر منك وما تفهميش فيها.
عيلة “الألفي” كانت ماسكة واحدة من أكبر شركات المستلزمات الطبية واللوجستيات في البلد.
مناقصات حكومية.
مستشفيات.
جمعيات أهلية.
أملاك وعقارات.
ومعارف في أماكن، التليفون الواحد منها يغير مجرى أي قض.ية أو تحقيق.
عملوا ثروة تعدي العشرة مليار جنيه.
وفريدة قضت ثلاثين سنة من عمرها بتتعلم إزاي تستخدم كل قرش من الفلوس دي كأنه س.لاح.
قربت مني وقالت:
— لو استمريتي في التدخل، بكرة الصبح هيكون في بلاغ رسمي ضدك بالتعدي على أطقم المستشفى وأمنها.
— أعلى ما في خيلكم اركبوه.
— وممكن أكلم ناس تقال أوي في وزارة الدفاع.
— كلمي اللي تعجبك.
ابتسامتها اختفت تماماً.
وهنا وقعت في الغلطة اللي قلبت الترابيزة كلها.
وطت على “نور” بغل.
— كفاية قرف بقى ولعب عيال!
ومسكت الماكينة والسلسلة.
وشدت.
السلسلة اتقطعت في إيدها.
— لااااا!
“نور” صرخت صرخة خلت كل اللي في الممر يقفوا مكانهم زي الصنام.
حاولت تفك نفسها وتفرك في السير الجلد لحد ما معصمها اتجرح وبيجيب دم.
الماكينة الصغيرة وقعت على الأرض.
“نور” اتلمت ورمت جسمها من على طرف الترامبولين بتحاول تطولها.
— “نور”!
لحقتها ومسكتها قبل ما تترزع على الأرض بكل جسمها.
فريدة طلعت ضحكة مستفزة.
— شوفوا الهبل!
وشاورت على الماكينة اللي في الأرض.
— كل الضجة والمهزلة دي عشان حتة بتاعة ملهاش تلاتين لازمة؟
“نور” مسكت الماكينة بسرعة وضمتها على صدرها وهي بتنهد.
حضنتها جامد.
وفي اللحظة دي حسيت بإيدها بتتسحب تحت جاكتتي.