رجع بعد ٥ سنين- محمد نور
نورهان كانت أول واحدة قدرت تتكلم.
— مرات… عمه؟
صوتها طلع حاد بشكل غريب.
ناصر بص لها لحظة واحدة بس.
واضح إنه مكانش يعرفها.
أما آدم، فتقدم نص خطوة ناحيتنا.
— عمي ناصر… يعني إيه الكلام ده؟
ناصر رفع حاجبه بهدوء.
— هو أنا محتاج أشرح لك يعني إيه كلمة «مرات»؟
آدم أشار لي بإيده.
— بس هي…
وسكت لحظة قبل ما يكمل:
— هي كانت مخطوبة لي!
درجة الحرارة في المكان كأنها نزلت فجأة.
ناصر شال إيده من على خصري ببطء.
مش لأنه كان عايز يبعد عني.
هو بس لف بجسمه كله ناحية ابن أخوه.
— من خمس سنين.
آدم ضغط على فكه.
— أنا مفسختش الخطوبة.
ناصر رد بمنتهى الهدوء:
— إنت سبتها.
الجملة كانت قصيرة.
من غير صوت عالي.
ولا لوم.
ولا حتى عصبية.
وعشان كده كانت أثقل من أي خناقة.
اتنين من الضباط اللي كانوا معديين قريب مننا قللوا سرعتهم بشكل تلقائي.
رجوع آدم الشافعي للقاعدة كان معروف.
وكمان قصة اختفائه القديمة كانت معروفة.
لكن قليل جدًا اللي كانوا يعرفوا كل التفاصيل.
ناصر كمل:
— كان عندك مهمة عسكرية محددة. سبت موقعك قبل التحرك بساعات، واختفيت عشان ترافق مدنية.
نورهان اتشدت مكانها.
— أنا مقلتش له يسيب أي مهمة.